إبراهيم حامد

الكون فراغ
والنفس أول سلمة للهاوية
لما بتركب حلمها للمستحيل
وف وسط دايرة نفسنا
بؤرة وجع بتشد عمرى وتجدله
سكة سفر للانتهاء
مابقاش فى صدرى غير بواقى الذاكرة
لسه الرفوف شايله المبادئ
هيه ... هيه
لسه الحنين جوه القصايد
ما فضلش منى غير هياكل للبداية
ما تقوليش
إن الستار ما نزلش لسه ع النهاية
إيه الدليل
دا أنا كنت لون النن فى عيونك
وأنت المدار
دلوقتى ناطقك صرختين
صرخة بتعلن انتمائى للوجع
والتانية بتفكرنى بيكى ..
ما تقوليش ان السكوت ممكن يكون عكس الرضا
ما تقوليش..
له معنى بيتولد
من دغدغة عضمك فى عضمى
لازم حبيبتى نعترف
إنك .. وأنا
يفصل ما بينا
ألف سكة وألف حلم
يفصل ما بينا شوق حلال
بيقول خلاص حضنك محال
وانك دواير دوامات
وانك ممات
وحروف بتخنق ف الوريد
زمنى الضعيف
آسف لو آجى أرسمك
تطلع ملامحك شيء مخيف
وتباتى جوايا خلايا الانتحار
تقطعينى من دوايرك
تعصرينى ..
انزفك م الذاكرة
واطوى ملامح غربتى
بين السطور
وندق أجراس الكنايس
تعلنك صوتى اللى مات
تعلن إنى
زى كل المستحيلات
اللى ساكنه جوه منى
بانتهى